هسه أجيتي؟
بعدما غطه الثلج راسي أولحيتي
وين جنتي يابعد كل العمر
آنه أتاني أسنين وأنتي مادريتي
مادريتي الشوفتج كلبي يرف
أومادريتي الشوك ألبكلبي كلف
أومادريتي العمر كلما طال ينبوع أويجف
أدري جنتي نايمة أوتوج صحيتي
هسه أجيتي؟
آنه آسف وأعتذر عما بدر
كان قصدي ليش باعدنه القدر
ليش مالمنه حبيبي امن الزغر
هايم أبشوكج وتاني وانتظر
بعد ماضاع العمر أنتي أجيتي
هسه أجيتي؟
شاب مني الراس والظهر أنحنه
جان كل يوم اليمر مني أبسنه
أومن لكيتج كلبي مابطل غنه
أوصار حته المشي مالي أبرهدنه
صدك هذا الحب يرد شايب صبي
هسه أجيتي؟
آنه عمري اللي مضه ماينحسب
أدأيه من عمري قبلك راح وعده ياحبيبي أوينشطب
أنته مرهم للجروح أوأنته طب
وأنته نسمه التحمل أهديبي العذب
رديت عمري الراح ياأحله ضبي
هسه أجيتي؟
جنت عايش عل الأمل وبكلبي نار
أوجنت ماأعرف أنه أبليل أونهار
أوضاع بين الأمل عمري وانتظار
وانتظاري ألج كان أروع أختيار
يامياه الدنيه كلها والبحار
أضربي شاطيء قلبي واقربي
هسه أجيتي
كلمه كالته حبيبي جرحن أخدودي الدموع
أومن بعد عينك يغالي لاتظن تضوي الشموع
مادرت هي عذابي أوجرح غافي بالضلوع
أوهي فرحي أويم سهل كلبي ربوع
الجبل مايهل دمعه يبقه مهيوب أوأبي
هسه أجيتي؟
أدري صار أسنين يمعوده أنتظر
بعد ماعاطت نخلتي أوبعدما تحمل تمر
بعد ماشاب الصدر مني أوترس كلبي الجمر
والقدر هسه جمعنه؟هاي ألاعيب القدر
لاتظن أترك هواهه هي اللي قبله أونبي
هسه أجيتي؟
أتأخرت جيتج ولوفد شي قليل
جان أجيتي كبل مده ولوهذا مستحيل
آنه أعتب عل زمان الماجمعنه أثنينه خل أوخليل
جان كظينه المضه أفراح ياعمري الجميل
والله هاي الروح مسبيه تره أبحبج سبي
هسه أجيتي؟؟؟